أدب و أدباء - تحرره نوال شلباية
«زي الكارو» .. قصيدة للشاعر / حسين موصلي
أنا أكتر واحد يمكن كان عنده أحباب
أنا أقصد أنا أكتر حد كنت متبت
ويمكن برده أكتر حد اتساب
وبدون أسباب
غير هي ظروف كانت دايما بتعاند
واكمني جوايا الصخر الجامد
فأنا بخبط في الدنيا
وبتفرفت أحزان
كما زان بيشيل الحمل
وعمره ما طق
وبرغم الدنيا البنزين
أنا زي «الكارو»
وماشي فيها بالزق
وبغني الآه
وبغني الآاه
لأن العيشة
ما بتحبش اللأ
قلبي دا كان حديد
زماني بالنار كواه
ف رق
ودماغي ياما صالت
في طبول الحرب
فهيفرق إيه
يا شاكوش الدنيا
كمل دق
** مختتم
علي إيه الأحزان
والعمر كله من زعل
النكتة شاعر والكَبيرة
هيقولوا إن فكره ضل
الضحك يوم والحزن كوم
الفرحة براح والكآبة زي ذل
والخلاصة كل الكلام فاضي
إلا لو كان التقل فعل
فاضحك وعيش
دي الدنيا زي شوك
وضحكتك ورد وفل
